ताज्या घडामोडी मोबाइल वर मिळवा.फोटो वर क्लिक करा

शिरूर (पुणे ग्रामीण): “तू माझी गावात बदनामी का केली?” या कारणावरून झालेल्या वादातून शिरूर तालुक्यातील जांभूत गावच्या हद्दीत एका हॉटेल व्यावसायिकाला सात जणांनी मिळून बेदम मारहाण केल्याची घटना घडली आहे. याप्रकरणी शिरूर पोलीस स्टेशनमध्ये बेल्हा (ता. जुन्नर) येथील तीन निष्पन्न आरोपींसह त्यांच्या इतर चार साथीदारांविरुद्ध विविध कलमान्वये गुन्हा दाखल करण्यात आला आहे.

नेमकी घटना काय.?

फिर्यादी अनिकेत संतोष चासकर (वय २५, रा. लोणी मावळा, ता. पारनेर) हे दि. ११ जानेवारी २०२६ रोजी रात्री १० वाजेच्या सुमारास जांभूत येथील ‘हॉटेल शिवगंगाई बिर्याणी हाऊस’मध्ये होते. यावेळी आरोपी अजिंक्य पिंगट, जुबेर, गोट्या (पूर्ण नाव माहिती नाही, सर्व रा. बेल्हा, ता. जुन्नर) आणि त्यांचे इतर चार साथीदार एका वॅगनआर गाडीतून तेथे आले.

“तू माझी गावात बदनामी का केली?” अशी विचारणा करत अजिंक्य पिंगट याने अनिकेतशी वाद घातला. अनिकेतने विचारणा केली असता, सर्व आरोपींनी मिळून त्यांना धक्काबुक्की व शिवीगाळ करण्यास सुरुवात केली.

खुर्ची आणि काठीने हल्ला..!

हा वाद इतका विकोपाला गेला की, आरोपी अजिंक्य पिंगट याने हॉटेलमधील खुर्ची उचलून अनिकेतच्या डोक्यात व पाठीत मारली. तर आरोपी जुबेर याने त्याच्या गाडीतील काठी काढून अनिकेतला बेदम मारहाण केली. यावेळी अनिकेत यांनी आरडाओरडा केल्यावर सर्व आरोपी वॅगनआर गाडीतून पसार झाले.

फोनवरून पुन्हा धमकी..

मारहाण करून निघून गेल्यानंतरही आरोपींची दहशत थांबली नाही. रात्री ११:०६ च्या सुमारास अजिंक्य पिंगट याने अनिकेतला फोन करून “मी जुन्नरचा बाप आहे, तुझ्याकडे बघतो” अशी जीवे मारण्याची धमकी दिल्याचे फिर्यादीत नमूद करण्यात आले आहे.

गुन्हा दाखल व तपास..!

याप्रकरणी अनिकेत चासकर यांनी शिरूर पोलीस स्टेशनमध्ये धाव घेऊन तक्रार दिली. पोलिसांनी आरोपींविरुद्ध भारतीय न्याय संहिता (BNS) कलम १८९ (२), १९१ (२), १९१ (३), १९०, ११८ (१), ३१५ (२), ३५१ (२) (३) (४) नुसार गुन्हा नोंदवला आहे.

 * तपास अधिकारी: पोलीस हवालदार पालये (ब. नं. २१८)

 * दाखल अंमलदार: पोलीस हवालदार गवळी (ब. नं. २२७१)

 * मार्गदर्शन: पोलीस निरीक्षक संदेश केंजळे (शिरूर पोलीस स्टेशन)

पुढील तपास शिरूर पोलीस करत आहेत.