शिरूर नगरपरिषदेत ४० लाखांचा भंगार घोटाळा? प्रशासनाकडून ‘अज्ञाता’वर गुन्हे दाखल; आंदोलकांचा ‘सत्याग्रही’ लढा उभारण्याचा इशारा!

ताज्या घडामोडी मोबाइल वर मिळवा.फोटो वर क्लिक करा

शिरूर (प्रतिनिधी, निर्भय न्यूज लाईव्ह):

शिरूर नगरपरिषदेच्या प्रशासकीय काळात पटांगणातील मोकळ्या जागेत ठेवलेल्या अंदाजे ४० लाख रुपये किंमतीच्या भंगार साहित्याची परस्पर विक्री करून अपहार केल्याचा गंभीर आरोप आंदोलनकर्त्यांनी केला आहे. या प्रकरणी नगरपरिषद प्रशासनाकडून बारंवार ‘अज्ञात’ व्यक्तींविरुद्ध गुन्हे दाखल करून मूळ प्रकरणावरून लक्ष भरकटवण्याचा प्रयत्न होत असल्याचा दावा करत, आता या विरोधात आरपारची लढाई म्हणून ‘सत्याग्रही आंदोलन’ छेडण्याचा इशारा देण्यात आला आहे.

➔ मूळ मागणी बाजूला, गुन्हे भलतेच! (प्रकरणाची पार्श्वभूमी)

मिळालेल्या माहितीनुसार, सन २०२२ पासून शिरूर नगरपरिषदेच्या आवारातील मोकळ्या जागेत पडलेल्या लाखोंच्या भंगार साहित्याच्या संशयास्पद विक्रीबाबत तक्रारदारांकडून सातत्याने पाठपुरावा व आंदोलने केली जात आहेत. याप्रकरणी शिरूर आणि जिल्हाधिकारी कार्यालय, पुणे येथे तब्बल ५ वेळा आंदोलने झाल्यानंतर अखेर १४ जानेवारी २०२६ रोजी दुसरा गुन्हा दर्ज करण्यात आला.

तक्रारदारांचा खळबळजनक दावा:

 २०२२ साली पोलिसांनी नोंदवलेला पहिला गुन्हा हा बंद खोलीतील साहित्य चोरीचा होता. मात्र, तक्रारदारांच्या मते त्यांची मूळ तक्रार बंद खोलीतील साहित्याची नसून, मोकळ्या पटांगणात असलेल्या ४० लाखांच्या भंगाराची होती. नगरपरिषद प्रशासनाने संगनमताने हे साहित्य विकल्याचा संशय असताना, दरवेळी ‘अज्ञात’ व्यक्तीविरोधात गुन्हा दाखल करून तपासाची दिशा बदलली जात असल्याचा आरोप आंदोलकांनी केला आहे.

➔ स्वच्छता निरीक्षकावर आरोप; निष्पक्ष तपासाची मागणी

आंदोलकांनी वरिष्ठ अधिकाऱ्यांना दिलेल्या निवेदनात असा दावा केला आहे की, या संपूर्ण भंगार विक्री प्रकरणात नगरपरिषदेचे स्वच्छता निरीक्षक दत्तात्रेय बर्गे यांची भूमिका संशयास्पद असून, तेच या प्रकरणातील मुख्य सूत्रधार असल्याचा आरोप आंदोलकांनी केला आहे.

या पार्श्वभूमीवर:

 * तक्रार नोंदवणारे संबंधित फिर्यादी आणि

 * स्वच्छता निरीक्षक दत्तात्रेय बर्गे

या दोघांचीही सखोल चौकशी करून त्यांच्यावर कायदेशीर कारवाई करण्यात यावी, अशी मागणी निवेदनाद्वारे करण्यात आली आहे.

➔ वरिष्ठ पोलीस यंत्रणेकडे धाव

शिरूर पोलीस ठाण्याच्या प्रमुखांची भेट घेऊन सविस्तर माहिती व कागदपत्रे देऊनही स्थानिक पोलिसांकडून ठोस कारवाई होत नसल्याचे पाहून आंदोलकांनी अखेर मा. पोलीस अधीक्षक (पुणे ग्रामीण) तसेच मा. विशेष पोलीस महानिरीक्षक (कोल्हापूर परिक्षेत्र) यांच्याकडे धाव घेतली आहे.

स्थानिक पोलीस प्रशासनाकडून योग्य तो तपास केला जात नसल्याची भावना निर्माण झाल्याने, भ्रष्टाचाराच्या या प्रकरणाचा पर्दाफाश करण्यासाठी आणि दोषींवर कडक कारवाई मिळवण्यासाठी ‘सत्याग्रही आंदोलन’ करण्यावर आंदोलक ठाम आहेत.