चारित्र्याच्या संशयावरून पत्नीचा लाकडी दांडक्याने बेदम मारहाण करून निर्घृण खून; डोंगरगण येथील धक्कादायक प्रकार!

ताज्या घडामोडी मोबाइल वर मिळवा.फोटो वर क्लिक करा

निर्भय न्यूज लाईव्ह (विशेष प्रतिनिधी, शिरूर):

शिरूर तालुक्यातील डोंगरगण (शिवनगर) परिसरातील एका शेतावर चारित्र्याच्या संशयातून पतीने आपल्याच पत्नीचा लाकडी दांडक्याने बेदम मारहाण करून निर्घृण खून केल्याची धक्कादायक घटना रविवारी (दि. २६) घडली आहे. या प्रकरणातील आरोपी पतीला शिरूर पोलिसांनी तातडीने ताब्यात घेतले असून न्यायालयाने त्याला गुरुवार (दि. ३१) पर्यंत पोलीस कोठडी सुनावली आहे.

      नेमकी घटना काय?

मिळालेल्या माहितीनुसार, आरोपी तुकाराम हेमा काळे (वय ३८, रा. शिनोली, ता. आंबेगाव) व त्याची पत्नी शीतल तुकाराम काळे (वय ३५) हे गेल्या १५ दिवसांपासून (डोंगरगण) शिरूर येथील डॉ. हिरामन चोरे यांच्या शेतावर शेतमजूर म्हणून काम करत होते. आरोपी तुकाराम हा दारूच्या नशेमध्ये पत्नीच्या चारित्र्यावर संशय घेऊन तिला वारंवार मारहाण करत असल्याचे प्राथमिक तपासात समोर आले आहे.

रविवारी दुपारी याच शेतावर मुकादम म्हणून काम करणारे ओमकार बाळू भिंगे हे गोठ्याकडे जात असताना त्यांना एका खोलीतून रडण्याचा आवाज आला. त्यांनी खिडकीतून पाहिले असता, तुकाराम काळे याने खोलीचा दरवाजा आतून बंद करून पत्नी शीतल हिला लाकडी दांडक्याने बेदम मारहाण चालवली होती.

मध्यस्थी करणाऱ्याला जीवे मारण्याची धमकी व दगडफेक

मुकादम ओमकार भिंगे यांनी आरोपीला मारहाण थांबवण्यास सांगितले असता, “आत आलास तर तुझाही खून करीन,” अशी थेट धमकी आरोपीने दिली. भिंगे यांनी तातडीने शेतमालक डॉ. हिरामन चोरे यांना याबाबत माहिती दिली. त्यानंतर भिंगे यांची आई शालू भिंगे व इतर कामगारांसह सर्वांनी घटनास्थळी धाव घेतली. मात्र, आरोपीने खोलीतून बाहेर न येता खिडकीतून लोकांवर दगडफेक केली.

दरम्यान, आरोपी पती पत्नीला मारहाण करत असतानाचा संपूर्ण व्हिडियो ओमकार भिंगे यांनी आपल्या मोबाईलमध्ये चित्रित केला आहे.

पोलीस घटनास्थळी दाखल; आरोपीची गुन्ह्याची कबुली

घटनास्थळाची माहिती मिळताच शिरूर पोलीस तात्काळ घटनास्थळी दाखल झाले. पोलिसांनी आरोपीला दरवाजा उघडण्यास सांगितले असता तो बाहेर आला. पोलिसांनी पत्नीला का मारले, अशी विचारणा केली असता, पत्नीच्या चारित्र्यावर संशय आल्याने रागाच्या भरात लाकडी दांडक्याने मारहाण करून तिचा खून केल्याची कबुली आरोपीने दिली.

सोमवारी (दि. २७) आरोपीला शिरूर न्यायालयात हजर केले असता, न्यायालयाने त्याला दि. ३१ पर्यंत पोलीस कोठडी सुनावली आहे. या घटनेमुळे परिसरात एकच खळबळ उडाली असून शिरूर पोलीस पुढील

तपास करत आहेत.