प्रशासकीय कारणास्तव पुणे ग्रामीणमध्ये बदल्यांचे सत्र; शिरूरच्या नवनियुक्त पोलीस निरीक्षकांचे विविध संघटनांकडून जंगी स्वागत!

ताज्या घडामोडी मोबाइल वर मिळवा.फोटो वर क्लिक करा

शिरूर (प्रतिनिधी):

पुणे ग्रामीण आणि पुणे शहर पोलीस दलात प्रशासकीय कारणास्तव नुकतेच मोठे फेरबदल करण्यात आले आहेत. पुणे ग्रामीणचे पोलीस अधीक्षक संदीप सिंग गिल यांनी जिल्ह्यातील तब्बल ३० पोलीस निरीक्षक आणि सहाय्यक पोलीस निरीक्षकांच्या अंतर्गत बदल्यांचे आदेश जारी केले आहेत. या बदल्यांमध्ये शिरूरसह सासवड, बारामती, लोणावळा आणि हवेली पोलीस ठाण्यातील अधिकाऱ्यांचा प्रामुख्याने समावेश आहे.

याच आदेशान्वये शिरूर पोलीस स्टेशनच्या निरीक्षक पदी अत्यंत अनुभवी अधिकारी विनोद पाटील यांनी नुकतीच आपल्या पदाची सूत्रे स्वीकारली आहेत. माजी पोलीस निरीक्षक संदेश केंजळे यांच्या बदलीनंतर पाटील यांची या महत्त्वपूर्ण पदावर नियुक्ती करण्यात आली आहे.

२१ वर्षांचा प्रदीर्घ अनुभव

नवनियुक्त पोलीस निरीक्षक विनोद पाटील यांचा पोलीस सेवेतील अनुभव अत्यंत दांडगा आहे. सन १९९६ मध्ये ते पोलीस सेवेत दाखल झाले. त्यांनी मुंबई येथे २१ वर्षांपेक्षा अधिक काळ पोलीस निरीक्षक म्हणून विविध आव्हानात्मक आणि संवेदनशील जबाबदाऱ्या यशस्वीपणे सांभाळल्या आहेत. सुमारे आठ महिन्यांपूर्वीच त्यांची पुणे ग्रामीण पोलीस दलात बदली झाली होती आणि आता त्यांच्या खांद्यावर शिरूर पोलीस ठाण्याची धुरा सोपवण्यात आली आहे.

विविध संघटनांकडून सदिच्छा भेट व स्वागत

विनोद पाटील यांनी शिरूर पोलीस स्टेशनची सूत्रे हाती घेतल्यानंतर शहरातील विविध सामाजिक संघटना, पत्रकार, व्यापारी आणि रिक्षा चालक बांधवांनी त्यांचे उत्साहात स्वागत केले.

शिरूर शहरातील आम आदमी पार्टी शिरूर शहर अध्यक्ष, निर्भय न्यूज लाइव्ह संपादक अनिल डांगे,ज्येष्ठ सामाजिक कार्यकर्ते सावळाराम दादा आवारी, शिवनेरी रिक्षा संघटनेचे जिल्हा अध्यक्ष विजय मुनोत, जेष्ठ रिक्षा चालक भाऊ सरोदे व स्पेअर पार्ट विक्रेते यांनी शिरूर पोलीस स्टेशनचे नवनियुक्त पोलीस निरीक्षक विनोद पाटील साहेब यांची सदिच्छा भेट घेऊन त्यांना पुढील वाटचालीस शुभेच्छा दिल्या. या प्रसंगी शिरूर शहरातील व्यापारी संघटनेचे पदाधिकारी, रिक्षा चालक, प्रामुख्याने उपस्थित होते.या भेटीदरम्यान शहरातील कायदा व सुव्यवस्था अधिक मजबूत करण्याबाबत सकारात्मक चर्चा झाली.

अनिल डांगे (शहर अध्यक्ष, आम आदमी पार्टी, शिरूर व संपादक, निर्भय न्यूज)

“मुंबईसारख्या गजबजलेल्या आणि संवेदनशील भागात २१ वर्षांपेक्षा जास्त काळ कामाचा प्रदीर्घ अनुभव असलेले विनोद पाटील साहेब शिरूर पोलीस स्टेशनला लाभले आहेत, ही शिरूर शहरासाठी अतिशय समाधानाची बाब आहे. त्यांच्या या दांडग्या अनुभवाचा फायदा शिरूरमधील कायदा व सुव्यवस्था अबाधित राखण्यासाठी नक्कीच होईल. शहरातील वाहतूक कोंडी, आणि सर्वसामान्यांचे प्रश्न सोडवण्यास त्यांचे नेहमीच सहकार्य लाभेल, असा आम्हाला पूर्ण विश्वास आहे. आम आदमी पार्टी आणि ‘निर्भय न्यूज’ परिवारातर्फे आम्ही त्यांचे मनःपूर्वक स्वागत करतो आणि त्यांच्या पुढील यशस्वी कार्यकाळासाठी शुभेच्छा देतो.”