कर्जबाजारीपणातून चुलत नातवानेच केला दोन्ही आजींचा गेम! सुपे येथील दुहेरी हत्याकांड प्रकरणाचा सुपे पोलिसांकडून पर्दाफाश; आरोपीला ५ दिवसांची पोलिस कोठडी

ताज्या घडामोडी मोबाइल वर मिळवा.फोटो वर क्लिक करा

सुपे (ता. बारामती)

सुपे परिसरातील बाबुर्डी (ता. बारामती) गावच्या शेरेचीवाडीत सहा दिवसांपूर्वी घडलेल्या ज्येष्ठ महिलांच्या धक्कादायक दुहेरी हत्याकांडाचा सुपे पोलिसांनी अखेर यशस्वी उलगडा केला आहे. विशेष म्हणजे, हत्या करणारा भलतीकडे कोणी नसून पीडित महिलांचा चुलत नातूच निघाल्याने संपूर्ण तालुक्यात एकच खळबळ उडाली आहे.

या प्रकरणात पोलिसांनी विकास राजेंद्र लडकत (वय २६, रा. शेरेचीवाडी, ता. बारामती) या संशयित तरुणाला पहाटेच्या सुमारास ताब्यात घेऊन अटक केली आहे. आरोपीला न्यायालयात हजर केले असता, न्यायालयाने त्याला ५ दिवसांची पोलिस कोठडी सुनावली आहे, अशी माहिती सुपे पोलिस ठाण्याचे प्रभारी अधिकारी शशांक शेळके यांनी दिली.

कर्जबाजारीपणामुळे घडले क्रूर कृत्य

सुपे पोलिसांच्या प्राथमिक तपासानुसार, आरोपी विकास लडकत याच्यावर मोठे कर्ज झाले होते आणि त्याला पैशांची प्रचंड गरज होती. याच कर्जबाजारीपणातून त्याने आपल्याच चुलत आजींच्या हत्येचा कट रचला आणि गुन्हा केल्याची कबुली दिली, असे शेळके यांनी सांगितले.

काय घडले होते नेमके?

शेरेचीवाडी येथील इंदूमती लडकत (वय ७५) व कृष्णाबाई लडकत (वय ५५) या चुलत सासू-सुनांची मंगळवारी (ता. २९ सप्टेंबर) राहत्या घरी निर्घृण हत्या झाल्याचे उघडकीस आले होते. घटनेच्या वेळी सोन्याच्या दागिन्यांची चोरी झाल्याचे दिसून आल्याने हत्येमागील नेमके कारण काय असावे, याबाबत ग्रामस्थांमध्ये उलटसुलट चर्चा सुरू होती.

सीसीटीव्हीअभावी तपासाचे मोठे आव्हान

या घटनेनंतर परिसरातील भीतीचे वातावरण लक्षात घेता आरोपींच्या शोधासाठी तब्बल १० अधिकारी व ५५ पोलिस कर्मचाऱ्यांची विविध पथके तयार करून तपास सुरू करण्यात आला होता. परिसरात सीसीटीव्ही कॅमेरे नसल्यामुळे तांत्रिक तपासात पोलिसांना अनेक अडचणी येत होत्या. सुरुवातीला आरोपीचा कोणताही सुगावा लागत नव्हता; मात्र पोलिसांनी आपल्या गोपनीय सूत्रांच्या जाळ्याचा प्रभावी वापर करत कसून चौकशी केली आणि संशयित आरोपी विकास लडकत याला ताब्यात घेऊन गुन्ह्याचा छडा लावला.

दरम्यान, या संपूर्ण दुहेरी हत्याकांडाबाबत आणि तपासाच्या पुढील टप्प्याबाबत पोलिस अधीक्षक संदीपसिंग गिल हे सोमवारी (ता. ५) पत्रकार परिषद घेऊन सविस्तर माहिती देणार असल्याचे सांगण्यात आले आहे.

निर्भय न्यूज लाईव्ह – बातमी विश्वासाची, नजर सत्याची!