रांजणगाव MIDC मध्ये दहशत पसरवून खंडणी मागणाऱ्या तिघांवर गुन्हा दाखल

ताज्या घडामोडी मोबाइल वर मिळवा.फोटो वर क्लिक करा

पुणे (शिरूर): रांजणगाव एमआयडीसी परिसरातील औद्योगिक वसाहतीत दहशत निर्माण करून, स्क्रॅप व्यवसायासाठी महिन्याला ५० हजार रुपयांची खंडणी मागणाऱ्या आणि कामगाराला मारहाण करणाऱ्या तीन जणांविरुद्ध रांजणगाव पोलीस ठाण्यात गुन्हा दाखल करण्यात आला आहे. भारतीय न्याय संहिता (BNS) च्या विविध कलमान्वये हा गुन्हा नोंदवण्यात आला आहे.

नेमकी घटना काय?

फिर्यादी सौ. योगिनी सचिन सांबारे (वय ३३, रा. निमगाव भोगी) यांचे रांजणगाव एमआयडीसीमधील ‘इलेक्ट्रॉनिक कंपनी’मध्ये स्क्रॅपचे (भंगार) काम सुरू आहे. शुक्रवारी, दि. २० मार्च २०२६ रोजी दुपारी दीड वाजेच्या सुमारास, त्यांचा टेम्पो (क्र. MH 12 YB 0344) जाबील कंपनी ते परीटवाडी रोडवर जात असताना आरोपींनी तो अडवला.

यावेळी आरोपी साहिल दीपक मलगुंडे, गणेश कोळपे आणि त्यांच्यासोबत असलेल्या एका अनोळखी साथीदाराने फिर्यादीला धमकावत म्हटले की, “ही आमची हद्द आहे, इथे तुम्हाला काम करायचे असेल तर महिन्याला ५०,००० रुपये द्यावे लागतील.”

मारहाण आणि धमकी

पैसे देण्यास नकार दिला असता, आरोपींनी शिवीगाळ करत फिर्यादीचा सुपरवायझर दत्तात्रय जाधव याला हाताने मारहाण केली. “यापुढे इथे गाड्या चालू देणार नाही, गाड्या फोडून टाकीन,” अशी धमकी देऊन आरोपी तिथून निघून गेले. या प्रकारामुळे परिसरात भीतीचे वातावरण निर्माण झाले होते.

पोलीस कारवाई

याप्रकरणी योगिनी सांबारे यांनी दिलेल्या तक्रारीवरून रांजणगाव पोलिसांनी आरोपींविरुद्ध BNS ३०८(२), ३०८(३) (खंडणी), १२६(२), ११५(२) (मारहाण), ३५१(२), ३५१(३) (धमकावणे) यांसह अन्य कलमान्वये गुन्हा दाखल केला आहे.

तपासाची स्थिती:

 पोलीस निरीक्षक एम. एस. वाघमोडे यांच्या मार्गदर्शनाखाली सहाय्यक फौजदार शिंदे या प्रकरणाचा पुढील तपास करत आहेत.