शिरूर नगरपरिषदेत सत्ताधाऱ्यांना मोठा धक्का; अंतर्गत बंडाळीमुळे ५ विषयांना स्थगिती

ताज्या घडामोडी मोबाइल वर मिळवा.फोटो वर क्लिक करा

शिरूर: निर्भय न्यूज लाईव्ह वृत्तसेवा

शिरूर नगरपरिषदेच्या रसिक भाऊ धारिवाल सभागृहात पार पडलेली दुसरी सर्वसाधारण सभा कमालीची वादळी ठरली. नगरपरिषदेत सत्ताधारी राष्ट्रवादी काँग्रेस व राष्ट्रवादी शरदचंद्र पवार पक्ष यांच्याकडे बहुमत असतानाही, स्वतःच्याच गटातील नगरसेवकांनी बंडाचे निशाण फडकवल्याने सत्ताधाऱ्यांवर नामुष्की ओढवली आहे. विरोधकांनी पाच महत्त्वाच्या विषयांवर स्थगिती आणून सत्ताधारी गटाला चारीमुंड्या चीत केले.

नेमकं काय घडलं?

डिसेंबरमध्ये झालेल्या निवडणुकीनंतर नगरपरिषदेत सत्तांतर होऊन राष्ट्रवादीचे १२ नगरसेवक व एका अपक्षाच्या पाठिंब्याने सत्ता स्थापन झाली होती. नगराध्यक्षपदी ऐश्वर्या अभिजित पाचर्णे यांची निवड झाली होती. मात्र, अवघ्या दुसऱ्या सभेत सत्ताधारी गटातील “चार नगरसेवक” फुटून विरोधकांना मिळाल्याने राजकीय समीकरणे बदलली.

विरोधी भारतीय जनता पार्टीच्या नगरसेवकांनी (नितीन पाचर्णे, संतोष थेऊरकर, निलेश पवार, सागर नरवडे, उमेश शेळके, राजेंद्र लोळगे, सुनीता कुरुंदळे, पूजा पोटावडे, सुनीता भुजबळ) आक्रमक पवित्रा घेत मागील सभेत मंजूर झालेल्या ठरावांना विरोध केला.

स्थगिती देण्यात आलेले महत्त्वाचे विषय:

१. घोडनदीवरील कोल्हापुरी बंधारा येथील नदीपात्र स्वच्छता व गाळ काढणे.

२. हत्तीडोह पंपिंग स्टेशन येथील इंटेकवेल व जॅकवेलमधील गाळ काढणे.

३. पाणीटंचाई निवारणार्थ टँकर भाडे तत्त्वावर उपलब्ध करणे.

४. ‘ओपन स्पेस’ नगरपरिषदेच्या ताब्यात घेण्याबाबतचा ऐनवेळचा ठराव.

भ्रष्टाचाराचे आरोप आणि विरोधकांचा दावा:

भाजप नगरसेवकांनी आरोप केला की, सध्या या कामांची कोणतीही गरज नसताना जाणीवपूर्वक हे विषय अजेंड्यावर आणले गेले. यामध्ये भ्रष्टाचाराचा संशय व्यक्त करत त्यांनी शिरूर शहराच्या हितासाठी या कामांना स्थगिती दिल्याचे सांगितले. विशेषतः ‘ओपन स्पेस’चा विषय ऐनवेळी आणून घाईघाईने मंजूर केल्याचा आरोपही विरोधकांनी केला.

सत्ताधाऱ्यांची बाजू:

नगराध्यक्ष ऐश्वर्या पाचर्णे यांनी यावर स्पष्टीकरण देताना सांगितले की, “हे सर्व विषय मुळात विरोधी पक्षाचेच होते आणि शहराच्या विकासासाठी आम्ही ते मंजूर केले होते. मात्र, आता विरोधकच त्याला विरोध करत आहेत. आमच्या गटातील काही नगरसेवक तिकडे गेल्यामुळे आम्हाला या विषयांना स्थगिती द्यावी लागली.”

थोडक्यात सांगायचे तर..

शिरूर नगरपरिषदेत सध्या सत्ताधारी गटात फूट पडल्याने प्रशासकीय कामांना खीळ बसण्याची शक्यता निर्माण झाली असून, आगामी काळात शहरातील राजकीय वातावरण अधिक तापण्याची चिन्हे आहेत.